I
Llaqta masikuna
Mana Mama qhuchayuq kawsasunri?
Unay pachaqa
Tawantinsuyu may jatun Mama qhuchayuq karqa.
Chinchasuyumanta Qullasuyukama
Tukuy atiyniyuq Pacificoqpá anqas yakunqa
Tata Intiqpá wawakunanta  kawsaytawan atiytawan juñiq karqa.
Tata Intimantawan Mama Killamantawan
Lliphipiq k’anchayninqa
Mana tukukuq, qhispisqa Mama qhuchaqpá yakunta
May kusiywan k’anchaririq karqa.
(…)

IV
Mayk’aqkama wawqi masikuna
Suyunchik wisq’ayta muchusqanrayku
Ñawisninchik waqanqankuri?
Qaynaqa Puerto de Ilonta
Mama qhuchaman atiyniyuqwan lluksinanchiqqa
Sunquchaq suyananchik karqa.
Kunantaq Puerto Aguas Profundasninta.
Jawa  suyu masikunanchiqqa
Munasqanchik chiqa kasqanrayku yanapaysiwanchik.
Chile suyulla, rumi sunqu,
Mana ñawpaqman purinanchikta munanchu
Chanta manapuni Bolivia Mama qhuchayuq kananta munanchu.

V
Mayk’aqkama wawakunanchik
Qhapariq, kuyuy sapa Mama qhuchamanta
Yupaychasqa juq’u t’iyunwan musqhukunqankuri?
Mayk’aqtaq phusuqiyuq, uywa puquchik yaku patanta
Qhispisqa runa jina wamp’uykachasunri?
Juk sunqullawan suyachkanchik
Corte Internacional de Justicia de La Haya nisqaqa
Ch’uyanchasqanta riksichinanta…
Mama qhuchaqa kawsay, Mama qhuchaqa k’anchay
Mama qhuchaqa kallpa.
Mama qhuchaqa jatun jukchakuy, Mama qhuchaqa qhapaqyay,
Mama qhuchaqa jatunyay.
Mana jayk’aq jina Boliviapi tiyakuqkunaqa
Mama qhuchaq chhuyu wayrananta,
Yaku uywakunaq kuyurís ch’aqwarisqankuta,
Tankarakunaq ch’in  takirisqankutawan riksiyta munarichkanchik...

VI
Ichá ñapis
Chakikunanchikta,
Makikunanchikta uyakunanchikta ima
Pacificoq watasqa yakunpi juq’usunchik.
Qutuchakuna.
Kallpachakuna.
Kuska chiqachana.
Mama qhuchata muyurichispa, wawqi masikuna,
Makikunanchikta puraqmanta q’apirqunachik.